---

නාමල් රාජපක්ෂ සිය නීති විභාග සඳහා පෞද්ගලික පන්ති කාමරයක වාඩි වී ඇති බව කියනු ලැබේ. එහෙත් නිර්මලා කන්නන්ගර සිදු කළ දීර්ඝ විමර්ශනයකින් එක්සත් රාජධානියෙන් සහ ශ්‍රී ලංකාවෙන් නව සාක්ෂි අනාවරණය කර ඇති අතර, ඔහු නීති විද්‍යාලයට ඇතුළත් වීමට සුදුසුකම් නොලැබූ බවට ඇඟවීම් කරයි.

2009 වසරේදී, පාර්ලිමේන්තු මන්ත්‍රී නාමල් රාජපක්ෂ නීති විද්‍යාලයට ඇතුළත් වීමේ අවශ්‍යතා සපුරා තිබුණේ නැත. එසේ වුවද ඔහුට ඇතුළත් වීමට අවසර ලැබුණි.

වසර දහසයකට පසු, මතභේදයට තුඩු දුන් මෙම සිද්ධිය සම්බන්ධයෙන් දීර්ඝ විමර්ශනයකින් නව කරුණු අනාවරණය වේ. නාමල් රාජපක්ෂගේ ‘සිටි විශ්වවිද්‍යාලයේ’ (City University) උපාධිය, නීති විද්‍යාලයට ඇතුළත් වීමට ප්‍රමාණවත් නොවීය. එම උපාධියට ද, විවිධ විෂමතා පවතී.

ශ්‍රී ලංකාවේ නීතිඥයෙකු වීමට ඇති එකම මාර්ගය වන නීති විද්‍යාලයට ඇතුළත් වීම, පහසු කටයුත්තක් නොවේ. සෑම වසරකම දහස් ගණනක් විශාල බලාපොරොත්තු ඇතිව එහි ඇතුළත් වීමේ විභාගයට පෙනී සිටින නමුත්, සුදුසුකම් ලබන්නේ සිය ගණනක් පමණි.

පිළිගත් විශ්වවිද්‍යාලයකින් නීති උපාධියක් ඇති බව පෙන්වා දීමෙන් විභාගයෙන් නිදහස් වීමට අවස්ථාවක් ලැබේ. රාජපක්ෂ තෝරා ගත්තේ මෙම දෙවන මාර්ගයයි. ඔහු ලන්ඩනයේ ‘සිටි විශ්වවිද්‍යාලයෙන්’ නීති උපාධියක් ලබා ඇති බව කියා සිටියේය.

රාජපක්ෂ සිය නීති උපාධිය ආරම්භ කළේ 2006 සැප්තැම්බර් මාසයේදීය. පවතින වාර්තා වලින් පෙනී යන්නේ ඔහු 2006 සිට 2009 දක්වා ‘සිටි විශ්වවිද්‍යාලයට’ (City University) සහබාගී වී ඇති බවයි. ලංකාවට පැමිණීමෙන් පසු, ඔහු ලන්ඩනයේදී සිය නීති උපාධිය සම්පූර්ණ කළ බව පදනම් කරගෙන ශ්‍රී ලංකා නීති විද්‍යාලයට ඇතුළත් වීමට අයදුම් කළේය.

රාජපක්ෂ සිය අයදුම්පත නීති විද්‍යාලයට ඉදිරිපත් කළේ 2009 සැප්තැම්බර් 25 වැනිදාය. අයදුම්පතේ සටහන් අනුව, එය එදිනම සමාලෝචනය කර, අනුමත කර ඇත.

එහෙත්, නීති විද්‍යාල ආරංචි මාර්ගයක් හෙළි කරන්නේ විදේශීය සුදුසුකම්වල නිරවද්‍යතාව තහවුරු කිරීමට ඊට වඩා වැඩි කාලයක් ගත වන බවයි. “..සත්‍යතාව තහවුරු කර අනෙකුත් ලබා දී ඇති තොරතුරු නිවැරදි යැයි සැලකූ පසු, ඊළඟ ලියාපදිංචියේදී සිසුන් ලියාපදිංචි කරනවා.. එය සාමාන්‍ය ක්‍රියාපටිපාටියයි..”

ඔවුන් වැඩිදුරටත් පැවසුවේ අයදුම්පතක් ඉදිරිපත් කළ දිනම ශිෂ්‍යයෙකු ඇතුළත් කර ගැනීමට කිසිදු හැකියාවක් නොමැති බවයි.

රාජපක්ෂගේ අයදුම්පත ඉදිරිපත් කර අනුමත කරන අවස්ථාවේදී, ඔහුගේ විශ්වවිද්‍යාලය වන ‘සිටි විශ්වවිද්‍යාලය’, නීති විද්‍යාලය විසින් පිළිගෙන නොතිබුණි.

තොරතුරු දැනගැනීමේ පනත (RTI) යටතේ කළ ඉල්ලීමකින් පෙනී යන්නේ නීති විද්‍යාලය, ‘සිටි විශ්වවිද්‍යාලයේ’ උපාධි වැඩසටහන පිළිගෙන ඇත්තේ  රාජපක්ෂ ඇතුළත් වීමෙන් දින 20කට පසුව, එනම් 2009 ඔක්තෝබර් 15 වැනිදා බවයි.

ශ්‍රී ලංකා නීති විද්‍යාලයේ විදුහල්පති, ජනාධිපති නීතිඥ ප්‍රශාන්ත ලාල් ද අල්විස් මහතා පවසන්නේ පිළි නොගත් විශ්වවිද්‍යාලයකින් උපාධියක් ලබා ඇති ශිෂ්‍යයෙකුට නීති අධ්‍යාපන කවුන්සිලයේ විධිවිධාන යටතේ විද්‍යාලයට ඇතුළු වීමට “කිසිසේත්ම” ඉඩක් නොමැති බවයි.

ඊට අමතරව, රාජපක්ෂගේ නීති විද්‍යාලයට ඉදිරිපත් කළ අයදුම්පත අසම්පූර්ණ ය.

නීති උපාධි ය හරහා නීති විද්‍යාලයට අයදුම් කිරීමට අධ්‍යයන වාර්තාවක් (transcript) සහ උපාධි සහතිකයක් යන දෙකම අවශ්‍ය වේ. එහෙත්, නීති විද්‍යාලයට රාජපක්ෂගේ උපාධි සහතිකය කිසි විටෙක ලැබී නොමැති අතර, ලැබී ඇත්තේ ඔහුගේ අධ්‍යයන වාර්තාව පමණි.

2025 ඔක්තෝබර් 3 වන දින, රාජපක්ෂගේ අයදුම්පත පිළිබඳව තොරතුරු දැනගැනීමේ පනත (RTI) යටතේ කළ ඉල්ලීමකට පිළිතුරු දෙමින්, නීති විද්‍යාලය තහවුරු කළේ රාජපක්ෂගේ ගොනුවේ උපාධි සහතිකයක් නොමැති බවයි. ඒ වෙනුවට, නීති විද්‍යාලය සතුව 2009 වසරේ දී, ‘සිටි විශ්වවිද්‍යාලයෙන්’ රාජපක්ෂට යොමු කරන ලද ලිපියක් ඇත.

ලිපියේ මෙසේ සඳහන් වේ:

“..ඔබ වැඩසටහනේ සියලු අවශ්‍යතා සම්බන්ධයෙන් තක්සේරු මණ්ඩලය තෘප්තිමත් කර ඇති බවත්, ඒ අනුව ඔබට තුන්වන පන්තියේ නීතිවේදී උපාධියක්, පිරිනමන බවත් දැනුම් දීමට ලැබීම මට සතුටකි..”

රාජපක්ෂ මහතාට, ඔහු සතුව ඇතැයි කියා සිටින උපාධිය තිබුණද, එම උපාධිය නීති විද්‍යාලයට ඇතුළත් වීමට ප්‍රමාණවත් නොවීය.

2009 වසරේදී, විදේශීය විශ්ව විද්‍යාලයකින් ලබාගත් උපාධියකින්, නීති විද්‍යාලය සඳහා ඇතුළත් වීමේ අවශ්‍යතාවය වූයේ “එම උපාධිය ලබා ගත් රටෙහි නීතිඥ මණ්ඩලයට ඇතුළත් වීම සඳහා වන වෘත්තීය අධ්‍යයන පාඨමාලාවකට ඇතුළත් වීමට, එම උපාධිය සුදුසුකමක් ලෙස පිළිගෙන තිබේද” යන්නයි.

රාජපක්ෂ එක්සත් රාජධානියෙන් ලබාගත් උපාධිය එරට නීතිඥ මණ්ඩලයට ඇතුළු වීමට අවශ්‍ය ප්‍රවේශ සුදුසුකම් සපුරාලන්නේ නැත.

එක්සත් රාජධානියේ මෙම ක්‍රියාවලිය නියාමනය කරනු ලබන්නේ නීතිඥ ප්‍රමිති මණ්ඩලය (Bar Standards Board) විසිනි. අධ්‍යයන අදියර සම්පූර්ණ කිරීම සඳහා මණ්ඩලයේ අවශ්‍යතාවල සඳහන් වන්නේ “අධ්‍යයන අදියර සම්පූර්ණ කිරීම සඳහා වන සම්මත අවශ්‍යතාව වන්නේ 2ii එක්සත් රාජධානියේ ගෞරව උපාධියක් හෝ ඊට සමාන සුදුසුකමක්” බවයි. 2ii යනු පහළ-දෙවන පන්තියේ ගෞරව උපාධියක් (Lower-Second Class Honours Degree) වේ.

රාජපක්ෂ, ඔහුගේ අධ්‍යයන වාර්තාවට (transcript) සහ ‘සිටි විශ්ව විද්‍යාලයේ’ (City University) ලිපිය යන දෙකටම අනුව, ‘3 වැනි පන්තියේ’ (Class 3) හෝ ‘තෙවන පන්තියේ’ (Third Class) උපාධියක් ලබා ඇත. මෙය එක්සත් රාජධානියේ නීතිඥ මණ්ඩලයේ (UK bar) අවශ්‍යතා සපුරාලීමට ප්‍රමාණවත් නොවේ. එමනිසා, ඇතුළත් වීමේ විභාගයට පෙනී නොසිට නීති විද්‍යාලයට ඇතුළත් වීමේ අවශ්‍යතාවය ද සපුරාලන්නේ නැත.

මෙම කතාව සම්බන්ධයෙන් විමසූ විට නීති විද්‍යාලයේ විදුහල්පති ද අල්විස් මහතා පැවසුවේ සිසුන්ගේ සුදුසුකම් පිළිබඳ තොරතුරු බෙදා ගැනීමට තමාට නොහැකි බවයි. “..අපරාධ පරීක්ෂණ දෙපාර්තමේන්තුව රාජපක්ෂගේ සුදුසුකම් සම්බන්ධයෙන් විමර්ශනයක් පවත්වන අතර, මාගෙන් ප්‍රකාශ දෙකක් සහ නියෝජ්‍ය විදුහල්පති ෂෙහාන් පෙරේරා මහතාගෙන් එක් ප්‍රකාශයක් සටහන් කර ඇත..”

රාජපක්ෂ ශ්‍රී ලංකා නීති විද්‍යාලයට උපාධි සහතිකයක් ඉදිරිපත් නොකළද, ඔහු සිය ජයවර්ධනපුර විශ්වවිද්‍යාලයේ ශාස්ත්‍රපති (master’s) අයදුම්පතට එය ඉදිරිපත් කර ඇත.

තොරතුරු දැනගැනීමේ පනත යටතේ ලබා ගත් මෙම සහතිකයෙහි සඳහන් වන්නේ රාජපක්ෂට ‘සිටි විශ්වවිද්‍යාලයෙන් ‘ “නීතිය පිළිබඳ තුන්වන පන්තියේ ගෞරව සහිත” (with Honours in Law Class Three)” උපාධියක් පිරිනමා ඇති බවයි.

මෙම උපාධි සහතිකය අසාමාන්‍යය. එයට 2009 සැප්තැම්බර් 15 දින “උපකුලපති මැල්කම් ගිලීස් (Malcolm Gillies, Vice Chancellor)” විසින් අත්සන් කර ඇත. නමුත් ගිලීස් මහතා 2009 ජූලි මාසයේදී විශ්වවිද්‍යාලයේ උපකුලපති ධූරයෙන් ඉල්ලා අස්වී තිබුණි.

මේ පිළිබඳව විමසූ විට ගිලීස් මහතා පැවසුවේ: “..මම විශ්වවිද්‍යාලයෙන් පිටව ගිය පසු නිකුත් කරන ලද, මගේ අත්සන සහිත කිසිදු සහතිකයක් ගැන මම නොදනිමි..” යන්නයි.

එම අවස්ථාවේ සේවය කළ අන්තර්වාර උපකුලපතිවරයා මහාචාර්ය ජුලියස් වෙයින්බර්ග් (Prof. Julius Weinberg) මිස, ගිලීස් නොවන බව ද ‘සිටි විශ්වවිද්‍යාලය’ තහවුරු කළේය.

රාජපක්ෂ නීති විද්‍යාලයට ඉදිරිපත් කළ නීති උපාධි අධ්‍යයන වාර්තාව, ඔහුගේ ජයවර්ධනපුර විශ්වවිද්‍යාලයේ අයදුම්පතට ඇතුළත් කර නොතිබුණි.

රාජපක්ෂ නීති විද්‍යාලයට ඉදිරිපත් කළ අධ්‍යයන වාර්තාව සහ ජයවර්ධනපුර විශ්වවිද්‍යාලයට ඉදිරිපත් කළ උපාධිය ගැළපෙන්නේ නැත. නීති විද්‍යාලයෙන් ලබා ගත් අධ්‍යයන වාර්තාවේ ඔහුට “3 වැනි පන්තියේ” සාමාර්ථයක් ඇති බව සඳහන් වන අතර, ජයවර්ධනපුර විශ්වවිද්‍යාලයෙන් ලබා ගත් උපාධි සහතිකයේ “ගෞරව සහිත 3 වැනි පන්තිය (Class Three with honours)” ඇති බව සඳහන් වේ.

පැහැදිලි කිරීමක් ඉල්ලා සිටි විට, ‘සිටි විශ්ව විද්‍යාලය’ පැවසුවේ: ”යම් හෙයකින් එම ප්‍රතිඵල ලේඛනයට (transcript) යම් සුදුසුකමක් ඇතුළත් වන්නේ නම්, එය අදාළ වන අවස්ථාවලදී එම සම්මාන නාමයට ‘ගෞරව’ (with Honours) යන්න ද ඇතුළත් වනු ඇත.’

ඔහුගේ නීති උපාධියට අමතරව, ජයවර්ධනපුර විශ්වවිද්‍යාලයෙන් ලබාගත් ‘ශාස්ත්‍රපති සුදුසුකම් ලැබීමේ (Master of Arts Qualifying -MAQ)’ සහතිකයක් ද ඔහුගේ ශාස්ත්‍රපති උපාධි අයදුම්පතෙහි ඇති බව සඳහන් වේ. ජයවර්ධනපුර විශ්වවිද්‍යාලයේ ජ්‍යෙෂ්ඨ නිලධාරියෙකු මෙය අසාමාන්‍ය කරුණක් බව පවසයි. ඔහුට ගෞරව උපාධියක් තිබේ නම්, MAQ විභාගය සඳහා පෙනී සිටින්නේ ඇයි? නීති උපාධිය පමණක් තිබුණද ඔහුට ශාස්ත්‍රපති උපාධි ප්‍රවේශය (master’s admission) ලබා ගත හැකිව තිබූ බව ඔවුහු පවසති.

2025 අප්‍රේල් මාසයේ සිට රාජපක්ෂගෙන් අදහස් විමසීමට කිහිප වතාවක් උත්සාහ කළද, ඔහු ප්‍රතිචාර දැක්වූයේ නැත.

රාජපක්ෂ නීති විද්‍යාලයේදී ඉහළම ලකුණු ලබා ගැනීමට සමත් විය. ඔහු බැඳීම් නීතිය (Law of Obligations) සඳහා වූ විෂය ත්‍යාගය දිනා ගත්තේය.

එහෙත් ලන්ඩනයේ ‘සිටි විශ්වවිද්‍යාලයේ’ (City University of London) ඔහු දැක්වූ දක්ෂතා, ඔහුගේ පසුකාලීන ජයග්‍රහණ පිළිබිඹු වන්නේ නැත. ඔහු ඉඩම් සහ අපචාර නීතිය (Land and Tort Law) සහ රැකියා නීතිය II (Employment Law II), පවුල් නීතිය (Family Law) සහ ළමා නීතිය (Child Law) ඇතුළු විෂයයන් කිහිපයක් යාන්තමින් සමත් වී ඇත.

2010 දී, නීති විද්‍යාලයේ සමකාලීන ශිෂ්‍යයෙකු වූ තුෂාර ජයරත්න විසින්, රාජපක්ෂ නීති විද්‍යාලයේ විභාග සඳහා පෞද්ගලිකව පෙනී සිටීමෙන් වංචාවක් කළ බවට චෝදනා කළේය. උදිත ඉගලහේවාගේ සභාපතිත්වයෙන් පැවති ‘නීති විද්‍යාලයීය විමර්ශනයක’ ප්‍රතිඵල කිසි විටෙක ප්‍රසිද්ධියට පත් කර නැත. ඉගලහේවා අදහස් දැක්වීම ප්‍රතික්ෂේප කළේය.

නාමල් රාජපක්ෂ මෙම චෝදනා දිගින් දිගටම ප්‍රතික්ෂේප කර ඇත.

නිර්මලා කන්නන්ගර විසිනි