සුනිල් හඳුන්නෙත්ති ජනතා විමුක්ති පෙරමුණේ (ජවිපෙ) දේශපාලන මණ්ඩල සභිකයා තම පක්ෂ නායකත්වයේ දඹදිව ගමනට අදාළ කුහකකම් ගැන ලියපු සටහනක් පසුගිය දිනක දැක ගන්නට ලැබුණා. එම “කුහක ප්‍රකාශනයේ” කුහකකම් වර්ග තුනක් හා ගතිකත්වය ගැන ඔහු කතාකරනවා. කුහකකමින් තොරව සටහන කියවද්දී ගතිකත්වය ගැන කුහක ප්‍රශ්න කීපයක් මතුවුනා. ඒගැන කතා කරන්නට පෙර අපි හඳුන්නෙත්තිගේ “කුහක ප්‍රකාශනය” බලමු.
“..අනුර සහෝදරයා ඉන්දියාවේ ගිය ගමන ගැන දැන් විවිධ මත දැක්වීම් සංවාදයන් ඇතිවෙලා, ඒක දේශපාලන සංවර්ධන පැත්තෙන් හොඳ දෙයක්, මේ ඒ ගැන නෙමෙයි! ඒ හරහා මතු වී තිබෙන කුහකකම්- hypocrisy -වර්ග ගැනයි! එකක් සාමාන්‍ය මනුෂ්‍යයාට දැනෙන පුද්ගල කුහකකම (personal hypocrisy) වීරවංශට දැනිලා තියෙන්නෙ ඒක! අඩේ මමත් ජවිපෙ හිටිය නම් මටත් යන්න තිබුණු ගමනක් නේද ? මේකා මේ ගිහින් තියෙන්නේ, ඒක හරිම සාමාන්‍ය, අනුකම්පා කළයුතු කුහකකමක් ! රනිල් වික්‍රමසිංහට තියෙන්නේ වෙන කුහකකමක්! ඒක දේශපාලන කුහකකම සහ පන්තිමය කුහකකම, ( political and class hypocrisy ) මේ මම අපේ පන්තිය හැමදාම ඇදපු ඇදුම් ඇඳගෙන අනුර මොකද? ඒක නිසා තමයි සමන් රත්නප්‍රිය වගේ කසිකබල් හාදයෙක් දාලා රනිල් අපේ පන්ති පහ ගැන කියවන්නේ! රනිල්ගේ කුහකකම වීරවංශගේ කුහකකමට වඩා භයානකයි ! තව අයගෙන් ප්‍රකාශ වෙන්නේ පන්තිමය කුහකකම විතරයි!
තබුත්තේගම ඉපදිලා jvp කරපු, කෝච්චියේ බුලත් විට විකුණපු අනුරයා ලෝකයේ විශාලතම බලවත් රාජ්‍යයක් වන ඉංදියාවෙන් ආරාධනා කරලම රාජතාන්ත්‍රික ලෙස පිලිගැනීම ගැන තියෙන පන්තිමය කුහකකම! ඒ අයට ඔය පිළිගැනීම මහින්දානන්ද අලුත්ගමගේට, එස්.බී දිසානායකට නෙමෙයි, බාල බෙහෙත් ගනුදෙනු කරලා දැන් හිරේ වැටිලා ඉන්න කෙහෙළියට ලැබුනත් කට පියාගෙන ඉන්න පුළුවන්! කාලා ඉන්න බැරි මේ පිළිගැනීම “තනි සිග්නල් කනුව, තබුත්තේගම” එඩ්‍රස් එකේ අනුරයාට ලැබුණු එක යි!
මේ තුන් වර්ගයේම කුහකකම් ඇති අයගේ පොදු ලක්ෂණයක් තියෙනවා! ඒක තමයි මේ තුන්ගොල්ලටම ලෝක ගෝලය- පෘථිවිය කැරකෙන එක දශක ගානකට කලින් නතර වීම!, ඔවුන්ට අනුව අනුර තාම කියවන්නේ පන්ති පහ! ඔවුන් තාම ඉන්නේ ඉංදියාව අපිට පරිප්පු දාපු 80 දශකයේ! ඉන්දියානු ව්‍යාප්තවාදය ජනතාව ඉගනගත්තු කාලේ! රනිල්ගේ මාමා යැංකි ඩිකී රොනල්ඩ් රේගන්ට කඩේ ගිය කාලේ! අනුර අපි ඉන්නේ කැරකෙන ලෝක ගෝලයේ! දශක ගානක් ඉදිරියෙන්! ගතිකත්වය (dynamics )පිලිගන්න ලෝකයේ! නවීන වෙන දේශපාලනය එක්ක අලුත් උපාය උපක්‍රම තෝරමින්! ඉතින් අනුර සහෝදරයාට තියෙන්නේ මේ තුන් වර්ගයේම අසරණයින්ට අනුකම්පා කරලා අර රුසියානු කියමන අනුගමනය කිරීම! වස්කා නම් බළලා ඇහුම්කන් දෙයි, එහෙත් නොනැවතී කාගෙන යයි..”
හඳුන්නෙත්ති හෝ වෙනත් කවුරුන් හෝ මෙලෙස කරන්නා වූ කුහක ප්‍රකාශන මටනම් අදාලම නැහැ. මොකද රාජ්‍ය බලය ඉල්ලා සිටින ඕනෑම පුද්ගල‍යෙක් හෝ පක්ෂයක් විමසීමේ පරම අයිතිය ඡන්දදායකයාට තිබෙනවා. එවගේම ඒවා කුහකකම් කියා ප්‍රශ්නය මඟහැර යෑමේ අයිතියක් රාජ්‍ය බලය ඉල්ලා සිටින පුද්ගලයකුට හෝ පක්ෂයකට හෝ නැහැ. එහෙම කරන්න පුලුවන් ඒකාධිපතියන්ට විතරයි.
අනෙක් අතට මේ සියල්ල ගතිකයි. අද කුහකම් ලෙස නම් කළත් “රාජ්‍ය බලය ලැබුනොත්” එවිට ඒ ප්‍රශ්න කිරීම් රාජ්‍ය විරෝධී, කුමන්ත්‍රණකාරී ඒවා බවට ගතික වෙන්න පුලුවන්. එතකොට තමයි ලාල්කාන්ත කිව්ව ම‍ර්දනකාරී රාජ්‍ය යන්ත්‍රය ඒ ඒ පුද්ගලයන් සහ දැනටමත් “මාක් කරගෙන ඉන්නා අය” හොයා ගෙන එන්නේ. “ත්‍රස්ත විරෝධී පනත” “ඔන් ලයින් පනත” වගේ මර්දන අණ පනත් අවශ්‍ය වෙන්නේ.
සුනිල් හඳුන්නෙත්තිගේ “කුහක ප්‍රකාශන‍යෙන්” මට ප්‍රශ්නයක් මතුවුනේ ඔහු කියනා ගතිකත්වය ගැන විතරයි. එහෙම නැතිව ජවිපෙ එක එක කාලයට අඳින ඇඳුම් ගැන, හදන පෙරමුණු ගැන, ගොඩනගන – ගොඩදාන නායකයන් ගැන, කරන්නා වූ ප්‍රකාශයන් ගැන මට නම් කිසිම ප්‍රශ්නයක් නැහැ. ජවිපෙ වැනි පක්ෂයක් එහෙම කළේ නැතිනම් තමයි දේශපාලන ගැටළුවක් මතුවෙන්නේ.
ඉන්දියාවේ සිට සන්ඩේ ටයිම්ස් ඉංග්‍රීසි පත්තරයට ජාජබ නායක අනුර කුමාර දුරකතනයෙන් කියා තිබුනේ “අපි වෙනස්වෙලා, ඉන්දියාවත් එහෙමයි. අපි තරඟකරුවන් නොවුනාට ඉන්දියාව එහෙම තමයි. ඉන්දියාවේ ආරක්ෂාව ඇතුළු ඒ රටේ අවශ්‍යතා ගැන අපි සැලකිලිමත් වෙනවා,” යි කියලා.
ඕනෑම පක්ෂයකට හෝ පුද්ගලයකුට සිය ප්‍රතිපත්ති වෙනස් කර ගැනීමේ අයිතියක් තිබෙනවා. මම ප‍රිණාමවාදය පිළිගන්න කෙනෙක්. නමුත් ඡන්දය ලබා ගන්න, ඡන්දදායකයන් මුළා කරන්න, ලෝක බලවතුන්ගේ, කලාපීය බලවතුන්ගේ විශ්වාසය දිනා ගන්න අවශ්‍ය මූල ධාර්මික ප්‍රතිපත්ති පමණක් ගතික වෙන්නත්, අනෙක් ඒවා ස්ථතික (static) වෙන්නත් බැහැ. ඒක දේශපාලන අවස්ථාවාදය.
මේ තියෙන්නේ ජවිපෙ පන්ති පහේ තේමාවන් සහ ඒ පන්ති 5 පිළිබඳ ඔවුන් ගේ කෙටි හැඳින්වීමක්. (1) ලංකාවේ ආර්ථික අර්බුදය (2) ඉන්දියානු ව්‍යාප්තවාදය (3) ලංකාවේ වාමාංශික ව්‍යාපාරය (4) නිදහස යනු කුමක්ද? ( 5) ලාංකික විප්ලවය ගතයුතු මග.
පළමු වැනි පන්තියෙන් ලංකාවේ ආර්ථික අර්බුදය දේශපාලන අර්බුදයක් බවට පත් වන බවත්, එහි ප්‍රතිපලයක් ලෙස ඇමරිකානු යැංකි අධිරාජ්‍යවාදින් ගේ බලපෑමෙන් 1970 වන විට ලංකාවේ හමුදා පාලනයක් සිදුවෙන බවත් එයට එරෙහිව වහා සමාජවාදී විප්ලවය කළයුතු බව ජවිපෙ උගන්නනවා. දෙවැනි පන්තියෙන් කියවෙන්නේ අපේ රටට ආසන්නම ඉන්දියාව බූවල්ලකු මෙන් අවට කුඩා රටවල් ග්‍රහනයට ගන්නා ආකරය ගැනත්, ඉන්දියාව සහ අනෙකුත් රටවල සිටින ද්‍රවිඩ අය එකතු වී ද්‍රවිඩ රාජ්‍යයක් ගොඩනැගීමට උත්සහ දරන ආකාරය.
තුන්වැනි පන්තියෙන් කියා දෙන ලද්දේ ලංකාවේ ඒ වනවිට ක්‍රියාත්මක වුනු කොමියුනිස්ට්, සම සමාජ, කම්කරු පක්ෂය වැනි වාමාංශික දේශපාලන ව්‍යාපාරවල අවස්ථාවාදී සුලු ධනේෂ්වර ප්‍රතිපත්ති හා එයින් ලංකාවේ සමාජවාදී විප්ලවයට සිදුවී ඇති බරපතල හානි. හතර වැනි පන්තියෙන් අප රටේ ජනතාව මුහුන දී ඇති තත්වයත් නිදහස සීමා ඇති බවත් කිසිදු නිදහසක් නැති බව. පස්වැනි පන්තියෙන් ලංකාවේත් සමාජවාදී විප්ලවයක් සිදු කළ යුතු බවත් එය ඉතා ඉක්මන් කළ යුතු බවත් එයට අවැසි තත්වය ලංකාවේ ඇති බවත් පෙන්වා දීම.
“කැරකෙන ලෝක ගෝලයේ, දශක ගානක් ඉදිරියෙන්, ගතිකත්වය (dynamics ) පිළිගන්න, ලෝකයේ නවීන වෙන දේශපාලනය එක්ක අලුත් උපාය උපක්‍රම තෝරමින්” සිටිනවා යැයි කියා ගන්නා අනුරලාගෙන්, හඳුන්නෙත්තිලාගෙන් මම දැන ගන්න කැමතියි ඉහත සඳහන් පන්ති 5 ම දැන් අත් හැරලාද? නැතිනම් ගතික උනේ මොන පන්තිද ? ලංකාවේ දෙමළ ජනයා පිළිබඳ ස්ථාවරයත් ගතිකද? නැතිනම් ඒක විතරක් තාම ස්ථතිකද? සරළව කියනවානම් දෙමළ ජනතාව වෙනම ජාතියක්, උතුරු නැගෙනහිර කියන්නේ ඔවුන් ගේ නිජබිම කියලා පිළිගන්නවද? නැද්ද? ප්‍රශ්නය මොන තරම් කුහක උනත් උත්තරයක් දෙන්න පුලුවන්නම් හොඳයි.
“ඉංදියානු ව්‍යාප්තවාදය” කියන සංකල්පය ගතිකත්වයට ලක්වෙලා, හඳුන්නෙත්ති කියනා පරිදි නවීන දේශපාලනය එක්ක ගමන් කරන්නේ නම් ඒ සංදර්භය තුළ සිට බැලීමේදී උතුරේ තිබුනේ දෙමළ බෙදුම්වාදයක්ද? නැතිනම් විමුක්ති අරගලයක්ද? බර අවි යොදා පහර දීමට මහින්ද රාජපක්ෂට බලපෑම් කිරීම ගැන අද වෙනස් කියවීමක් තිබෙනවද? නැද්ද? ඉන්දු ලංකා ගිවිසුම පිළිබද එදා තිබූ නි‍ර්වචනය අදටත් වලංගුද? නැද්ද? ඒ ගිවිසුම හරහා පැමිණි බලය බෙදීමේ පළාත් සභා වෙනුවෙන් පෙනී සිටිය උන් හයදාහක් විතර මරා දැමීම හරිද, වැරදිද? දෙමළ ජනතාව තමන්ගේ නිජභූමිය ලෙස පිළිගන්නා, උසාවි ගොස් දෙකට බෙදූ උතුරු නැගෙනහිර ආපහු එකතු කරන්න කැමතිද? නැද්ද? යනාදී වශයෙන් අහන මේ කුහක ප්‍රශ්නවලට ප්‍රසිද්ධ ප්‍රකාශයක් කරන්න කැමතිද?
එතැනින් ආරම්භ කළ පුද්ගල ත්‍රස්තවාදය 88 ජනාධිපතිවරණය තෙක් පවත්වාගෙන යමින් ආර්. ප්‍රේමදාස ජනාධිපති කර වූ ප්‍රතිපත්තියේ අද වෙනස් මත‍යක් තිබෙනවද? මොකද ප්‍රේමදාස ජනාධිපති උනේ සමස්ත ඡන්දදායක සංඛ්‍යාවෙන් ලබාගත් 25% කට ආසන්න ප්‍රතිශතයකින්. එහෙම උනේ ජවිපෙ ප්‍රධානත්වයෙන් හැදූ “දේශප්‍රේමී ජනතා ව්‍යාපාරය” වමේ වේදිකාවට බෝම්බ ගහලා, වෙඩි තියලා, ඒකේ නායකයන්, පාක්ෂිකයන් මරාදාලා ඇතිකළ භීෂණය නිසා. එම භීෂණය ගැන මෙවැනි ප්‍රශ්න අහන කුහකයන්ගේ කට වැහෙන්නත් එක්ක “නවීන වෙන දේශපාලනය එක්ක අලුත් උපාය උපක්‍රම තෝරමින් ඉන්නා” dynamics හඳුන්, සඳුන් වගේ උත්තරයක් දෙයිද? අපි බලමු.
ඉන්දියාව දියුණුවීමේ පරීක්ෂණාගාරය ගුජ‍රාටය කියලා තමයි අගමැති මෝඩි කියන්නේ. විසිතුරු ගුජරාටයේ යට සාගින්න, ආගම්වාදය, ජාතිවාදය, කුලවාදය තමයි තිබෙන්නේ. අගමැති වූ දා සිට හින්දුත්වවාදී ප්‍රතිපත්ති තහවුරු කරන්න බලය මෙහෙයවන එක තමයි මෝඩි කරන්නේ. මහ ඇමැති හැටියට මෝඩි අනුමත කළ බවට විශ්වසනීය සාක්ෂි තිබෙන 2002 මුස්ලිම් විරෝධී සමුලඝාතනයත් ගුජරාට ‘දියුණුවේ’ ඉහලින්ම තියෙනවා.
ඊට සාපේක්ෂව කේරළයේ ගුණාත්මක වෙනසක් සෞඛ්‍ය, අධ්‍යාපන ඇතුළු සමාජ, ආර්ථික, දේශපාලන හැම ක්ෂේත්‍රයකම තිබෙනවා. ඉතිං සුනිල් හඳුන්නෙත්තිලා තෝරා ගන්නේ මෝඩිගේ ගුජරාටයද? නැතිනම් වාමාංශික‍යන්ගේ කේරළයද? කියලා මොන තරම් කුහකයෙක්ට උනත් අහන්න හිතෙන කුහක ප්‍රශ්නයක්. කුහක නොවී උත්තරයක් දෙනවද?
එහෙම කුහක ප්‍රශ්ණයක් අහන්නේ ජාජබ තෝරා ගන්නේ මෝඩිගේ ගුජරාට ක්‍රමවේදය බවට තිබෙන්නා වූ ගතිකය වැඩි නිසා. මොකද 1948 සිට 2009 මැයි දක්වා මිනිස් ඝාතන සිදු කරපු ශ්‍රීලංකා අපරාධකාරී රාජ්‍යයේ වින්දිතයන්ට, යුක්තිය ඉටුකරන බවට මේ දක්වා ජවිපෙ හෝ ජාජබ කිසිදු නායකයෙක් වචනයක් හෝ කතා කරලා නැහැ. අඩුම ගානේ ජවිපෙ ‘සදාදරණීය නායක’ රෝහණ විජේවීර (උන්නැහෙත් ගතික වෙලාද දන්නේ නැහැ) ගේ ම්ලේච්ඡ ඝාතනය ගැනවත් සත්‍යය හෙළි කරගන්න වැඩ කරලා නෑ. කතා කරන්නේම වංචා, දූෂණ හා හොරාකෑම ගැන විතරයි.
නමුත් රාජ්‍යයේ සාපරාධී කටයුතු කරන්න දායක වු බවට චෝදනා ලබන හිටපු හමුදා ලොක්කන්ට ජාජබයේ ඉහල පුටු දෙන ගතිකය නම් යස අගේට තියෙනවා. එනිසා රනිල් පළමුව පවත්වන (ලංකාවේ මෑතකදී, මාස තුන හතරකින් චන්දයක් පැවැත්වුවොත්) පාර්ලිමේන්තු මැතිවරණයේ විපක්ෂ නායකයා ලෙස කටයුතු කිරීමේ ගතිකයට අමුතුවෙන් සූදානම් වෙන්න ඕන වෙන එකක් නැහැ. ඉංදියානු “රෝ ඔත්තු සේවය” ට ගතිකයන් නිර්මාණය කරන්නත් පුලුවන් කියලා මතක තියා ගත්තොත් හොඳයි.
අවසාන වශයෙන් අතිශය කුහක ප්‍රශ්න කීපයක් අහන්න තිබෙනවා. ඔබගේ “කුහක ප්‍රකාශනයට” අනුව විජේවීර ගොඩ නැගූ ජවිපෙ දැන් ඉවරද? විජේවීර, චේගුවේරා ටැටුවක් විතරද? පපුවෙ ඉන්නේ ලෝක බැංකුව, ලෝක වෙළඳ සංවිධානය හා ජාත්‍යන්තර මූල්‍ය අරමුදලද? එසේ නම් ජවිපෙ ආරම්භයේ සිටම ඕනෑම උදාහරණයකට ගන්නා “වස්කා නම් බළලා ඇහුම්කන් දෙයි, එහෙත් නොනැවතී කාගෙන යයි” කියන ආත්තෝපදේශය පමණක් ගතික නොවී තිබෙන්නේ ඇයි? එයත් නවීන වෙන දේශපාලනය එක්ක අලුත් උපාය උපක්‍රම තෝරනවා වගේ වෙනස් උනොත් නරකද?
ඒ කොහොම උනත් ඡන්දදායකයෝ කුහක ප්‍රශ්න අහනකොට උපාසක බළලා වගේ හිටියත් ඔලුව වනනකොට දිල්ලියේ මිණිගෙඩි සද්දේ ඇහෙන එකනම් වළක්වන්න බැරි වෙයි.
- 76 වසරක අතීතයෙන්, 53 වසරක් ජවිපෙ සතුයි..! - September 18, 2024
- සිංහල බෞද්ධ අන්තවාදයට එරෙහිව නැගී සිටි බාහු.. [අවසන් කොටස] - August 9, 2024
- දේශප්‍රේමී ගල්කටස් වලට එරෙහිව ජනතාව අවියක් කරගත් බාහු.. [ පළමුවන කොටස] - August 7, 2024
