ශ්‍රී ලංකාව මුහුණ දුන් සහ තවමත් මුහුණ දෙන ආර්ථික අර්බුදයට හිටපු ජනාධිපති ගෝඨාභය රාජපක්ෂ සහ ඔහුගේ රජයේ ප්‍රධානීන් සහ නිලධාරීන් වගකිව යුතු බවට ශ්‍රී ලංකා ශ්‍රේෂ්ඨාධිකරණය අද තීන්දු කළේය.

ගෝඨාභය රාජපක්ෂ,  මහින්ද රාජපක්ෂ සහ බැසිල් රාජපක්ෂ මෙම තීන්දුව මගින් දඩුකඳේ ගසා තිබේ.

මෙම පෙත්සම ගොනු කරන ලද්දේ ට්‍රාන්ස්පේරන්සි ඉන්ටර්නැෂනල් ශ්‍රී ලංකා ක්‍රියාකාරීන් වන චන්ද්‍රා ජයරත්න, ජෙහාන් කනගරත්න සහ ජුලියන් බොලින් යන අය එක්වය. එමගින්  ශ්‍රී ලංකාවේ ඇති වූ අර්බුදයට වගකිව යුතු එම  පුද්ගලයින්ට එරෙහිව පියවර ගන්නා ලෙස ඉල්ලා මහජන අවශ්‍යතා යටතේ පෙත්සම ගොනු කරන ලදී.

ආචාර්ය අතුලසිරි කුමාර සමරකෝන්, සූසයප්පු නේවිස් මොරායිස් සහ ආචාර්ය මහීම් මෙන්ඩිස් යන අය  ගොනු කළ පෙත්සමද ඒ සමඟම සළකා බලා තිබේ.

හිටපු ජනාධිපති ගෝඨාභය රාජපක්ෂ, මුදල්  ඇමතිවරුන් වන මහින්ද රාජපක්ෂ, බැසිල් රාජපක්ෂ සහ අලි සබ්රි, එවකට අමාත්‍ය මණ්ඩලය, ශ්‍රී ලංකා මුදල් මණ්ඩලය, හිටපු මහ බැංකුවේ අධිපතිවරුන් වන ඩබ්ලිව් ඩී ලක්ෂ්මන් සහ අජිත් නිවාඩ් කබ්රාල්, හිටපු භාණ්ඩාගාර ලේකම් එස්.ආර්.ආටිගල, හිටපු ජනාධිපති ලේකම් පී බී ජයසුන්දර සහ මුදල් මණ්ඩලයේ සාමාජික එස් එස් ඩබ්ලිව් කුමාරසිංහ මෙම පෙත්සමේ වගඋත්තරකරුවන් ලෙස නම් කර තිබුණි.

ආර්ථික අර්බුදයට පෙර සේවය කළ මුදල් මණ්ඩලයේ සාමාජිකයින් වන සංජීව ජයවර්ධන සහ රනී ජයමහ යන මහත්වරුන් මෙම අයදුම්පතෙහි වගඋත්තරකරුවන් ලෙස ඇතුළත් කරන ලෙස ශ්‍රේෂ්ඨාධිකරණය නියෝග කර ඇති බව ද ට්‍රාන්ස්පේරන්සි ඉන්ටර්නැෂනල් ශ්‍රී ලංකා  ආයතනය අනාවරණය කළේය.

පෙත්සම්කරුවන් වන්දි ගෙවන ලෙස ඉල්ලා සිට නැති බැවින් වන්දි මුදලක් ගෙවන ලෙස නියෝග කළ නොහැකි බව පවසන නඩු තීන්දුව සෑම පෙත්සම්කරුවකුටම රුපියල් එක්ලක්ෂ පනස් දහස බැගින් ගෙවීමට නියෝග කර තිබේ.

නීති ආරංචි මාර්ග පවසන්නේ සිදු කරන ලද ආර්ථික අපරාධ වෙනුවෙන් රජයේ භාණ්ඩාගාරයට වන්දි ගෙවන ලෙස ඉල්ලා සිටියේ නම් මිලියන සිය ගණනාවක වන්දියක් ලබා ගැනීමට ඉඩ තිබුණූ බවයි.

එක්සත් ජනපද ඩොලර් හිඟය සහ සංචිත හැකිලීම, කුප්‍රකට කාබනික පොහොර ප්‍රතිපත්තියක්  සමඟ ඇති වු අස්වනු අසාර්ථකත්වයට සහ ආහාර හා ඉන්ධනවල උග්‍ර හිඟයකට තුඩු දුන් ශ්‍රී ලංකාව නිදහසින් පසු එහි දරුණුතම ආර්ථික අර්බුදයකට  හසුවිය‍.

මහා ජනයා අතිශය දුෂ්කරතාවයන්ට පත් වූ අතර පොලිම්වල ජනයා ඇද වැටී මිය ගියහ. රාජපක්ෂ සනුහරය විසින් ඇති කල මෙම අර්බූදය නිසා පොදු මහා ජනයාට වූ විපත ගණනය කර නැත. එම සියලු විපාකයන්ට රාජපක්ෂ කල්ලිය වගකිව යුතු බව මෙම තීන්දුවෙන් සනාථ වෙයි.

ජනතාව  දශලක්ෂ  ගණනින් වීදි බැස දැක්වූ විරෝධතා හමුවේ  හිටපු ජනාධිපති ගෝඨාභය රාජපක්ෂට පලා යාමට සිදුවිය.  අගමැති රාජපක්ෂ ඊට කලින්ම ඉල්ලා අස්වූයේ විරෝධතාකරුවන්ට එරෙහිව ඔහුගේ අගමැති නිවසේ සිට එල්ල කල තුච්ච ප්‍රහාරය ආපසු කැරකීමත් සමඟය. හමුදා ආධාරයෙන් අරලියගහ මන්දිරයෙන් පලා ගිය මහින්ද රාජපක්ෂ නාවික හමුදා කඳවුරක ආරක්ෂාව ලබා ගත්තේය. රාජපක්ෂවරුන්ගේ දීර්ඝ කාලීන මිතුරකු වූ රනිල් වික්‍රමසිංහ, රනිල් රාජපක්ෂ ලෙස බෞතීස්ම කර අගමැති සහ ජනපති බවට පත් කරන ලදදේ  ඉන් පසුවය.

රනිල් රාජපක්ෂ යටතේ මහා ජනයාගේ ජීවන තත්වය තවදුරටත් පහළ වැටුන අතර මූල්‍ය අරමුදල සමඟ ඇතිකර ගත් ගිවිසුමක් මත ආර්ථික අර්බූදය යම් දුරකට සමනය වී තිබේ. එසේ නමුත් මෑත සමීක්ෂණ පෙන්වන්නේ ආණඩුවේ ජනප්‍රියත්වය පවතින්නේ සියයට 7ක පහල මට්ටමක බවයි.

නඩුව විභාග කරන ලද්දේ අගවිනිසුරු ජනාධිපති නීතිඥ ජයන්ත ජයසූරිය, ජනාධිපති නීතිඥ බුවනෙක අලුවිහාරේ, ජනාධිපති නීතිඥ ප්‍රියන්ත ජයවර්ධන, ජනාධිපති නීතිඥ  විජිත් කේ මලල්ගොඩ, ජනාධිපති නීතිඥ  මුර්දු එන්.බී. ප්‍රනාන්දු යන ශ්‍රෙෂ්ඨාධීකරණ මඩුල්ල විසිනි.

විනිසුරු ප්‍රියන්ත ජයවර්ධන හැර අන් විනිසුරුවරුන් සිව් දෙනාම මෙම තීන්දුවට එකඟ වී තිබේ.

උපුටාගැනීම : ශ්‍රී ලංකා බ්‍රීෆ්