තොරතුරු දැන ගැනීමේ කොමිසමට සභාපතිවරයෙකු නිර්දේශ කිරීම පිළිබඳව ආණ්ඩුක්‍රම ව්‍යවස්ථා සභාවෙන් සහ එම පත් කිරීම පිළිබඳව ජනාධිපතිවරයාගෙන් කරන ඉල්ලීම. 

1. කලක සිට පුරප්පාඩු වී ඇති තොරතුරු දැන ගැනීමේ කොමිසමේ සභාපති තනතුර සඳහා සුදුසු පුද්ගලයෙකු නිර්දේශ කිරීමට ආණ්ඩුක්‍රම ව්‍යවස්ථා සභාව පියවර ගැනීමට සූදානම් බව දැන ගන්නට ඇත. එහිදී වඩාත්ම සුදුසු තැනැත්තෙකු පත්කරන්නේද යන්න ගැන සමාජ කතිකාවක්ද ගොඩනැගී ඇත.
2. ආණ්ඩුක්‍රම ව්‍යවස්ථාවෙන් තහවුරු කර ඇති තොරතුරු සඳහා ප්‍රවේශවීමේ අයිතිය බලාත්මක කිරීමේ සහ විනිවිද භාවය සහ වගකීම පිළිබඳ සංස්කෘතියක් නිර්මාණය කිරීමේ සුවිශේෂී කාර්ය භාරයක් එම කොමිසමේ සාමාජිකයන්ට සහ සභාපතිවරයාට පැවරෙන නිසා සභාපතිවරයා පත් කිරීමද විනිවිද භාවයෙන් සහ වගකීම පිළිබඳ සංස්කෘතිය තහවුරුවන ආකාරයට සිදුවිය යුතුයැයි අපි තරයේ විශ්වාස කරමු.
3. තොරතුරු දැන ගැනීමේ කොමිසමට කොමසාරිස්වරුන් පත් කිරීමේ දී එම පනතේ 12((2)(අ)(1) උපවගන්තියේ දක්වා ඇති සුදුසකම්වලට අමතරව පොදු සමාජ ජීවිතයේ දී මානව අයිතිවාසිකම් වෙනුවෙන් පෙනී සිටීම සහ ප්‍රජාතන්ත්‍රවාදී භාවිතයක් සුවිශේෂීව පෙන්නුම් කිරීම සහ ආචාරධාර්මික වීමද අතිශයෙන් වැදගත්යැයි අපි සිතමු.
4. 2022 ජන අරගලයෙන් පෙන්නුම් කළ සහ පසුගිය ජනාධිපති සහ පාර්ලිමේන්තු ඡන්ද විමසීම් වලදී තහවුරු වූ ආකාරයට අප සමාජයේ ආර්ථික දේශපාලන සහ සංස්කෘතික වශයෙන් බරපතළ වෙනස්කම් ජනතාව අපේක්ෂා කරති.
5. එමනිසා ජනතාවට ආණ්ඩුවේ ඇති වගවීම තහවුරු කරන ආයතනයක් වන තොරතුරු දැනගැනීමේ කොමිසමේ සභාපති තනතුරටත් සෙසු කොමසාරිස් තනතුරුවලටත් නම් කිරීමේ දී සාධනය කළ දැනීමක්, අත්දැකීම් සහ ප්‍රවීනත්වයක් ඇති අය පමණක් නිර්දේශ කරන ලෙස ව්‍යවස්ථා සභාවෙන් ඉල්ලා සිටිමු. එමෙන්ම පත් කිරීමේ දී ජනාධිපතිවරයා ද එම නිර්ණායක අනුගමනය කළ යුතුයැයි පහත සඳහන් අපි ඉල්ලා සිටිමු.